Заполните Ваши данные, мы с вами обязательно свяжемся
2026 жылғы 16 қазанда Ұлытау облысындағы республикалық маңызы бар А-17 «Қызылорда – Жезқазған» автожолының 216–314 км аралығындағы қайта жаңғыртылып жатқан учаскесінде мердігер ұйымдар асфальтбетон жабынының жоғарғы қабатын төсеу жұмыстарын аяқтады. Ұзындығы шамамен 98 км болатын бүкіл учаскеде асфальтбетон жұмыстары толық көлемде орындалды.
Жоба ЦАРЭС-тің 1, 2 және 6 дәліздерін байланыстыратын автомобиль жолын реконструкциялау жобасы аясында жүзеге асырылуда. Тапсырыс беруші — «ҚазАвтоЖол» ҰК» АҚ, қаржыландыру Азия даму банкінің қолдауымен жүргізілуде. Құрылыс 7-ден 10-ға дейінгі төрт лотта орындалды. Жол II техникалық санат талаптарына сәйкес салынды.
Жұмыстар 2025 жылдың сәуірінде басталып, екі құрылыс маусымына созылды.
FIDIC халықаралық шарт талаптарына сәйкес техникалық қадағалауды Renardet S.A. (Швейцария) және «Engineering Services» ЖШС (Қазақстан) консорциумы жүзеге асырады.
Біздің команда үшін жобадағы негізгі басымдықтардың бірі — құрылыстың барлық кезеңдерінде сапаны қамтамасыз ету болды. Техникалық қадағалау мамандары материалдардың әр партиясына кіріс бақылауын жүргізіп, жол төсемінің әр қабатын келесі жұмыстар басталғанға дейін тексерді. Сонымен қатар тәуелсіз зертханалық сынақтар жүргізіліп, төселген қабаттардан тікелей сынамалар алынды.
Асфальтбетон жұмыстарының сапасына ерекше назар аударылды. Нысанда күрт континенттік климат пен жекелеген учаскелердегі күрделі топырақ жағдайында жобалық және техникалық талаптардың сақталуын бақылайтын профильдік мамандар жұмыс істеді.
Асфальтбетон жұмыстарының аяқталуы — жобаның маңызды кезеңі. Жаңартылған жол Ұлытау және Қызылорда облыстары арасындағы көлік қатынасын анағұрлым сенімді әрі қауіпсіз етеді, сондай-ақ ЦАРЭС халықаралық көлік дәліздерінің бір бөлігі ретіндегі трассаның маңызын арттырады.
Қазіргі уақытта нысанда абаттандырудың қорытынды жұмыстары жалғасуда: жол белгілерін орнату, жол таңбаларын салу және қауіпсіздік элементтерін монтаждау.
Учаске пайдалануға берілгеннен кейін Defect Liability Period — ақаулар үшін жауапкершілік кезеңі басталады. Осы кезеңде техникалық қадағалау командасы жолдың жай-күйін және шарттық міндеттемелердің орындалуын бақылауды жалғастырады.
Engineering Services үшін осындай ірі инфрақұрылымдық жобаларға қатысу — өңірлердің көлік байланысын дамытуға қосқан үлес әрі халықаралық стандарттар бойынша ірі инфрақұрылымдық нысандарға техникалық қадағалау жүргізудегі тәжірибеміздің дәлелі.
Engineering Services — Біз тұрақты және сенімді орта қалыптастырамыз.
0
Похожие статьи
